Peyreget mendia

Mendi asko dira aldameneko beste handiago edo famatuago baten itzalean ahaztuta gelditzen direnak, baina ez da Peyregeten kasua, Midi d'Ossau mitikoaren aldamenean egonagatik mendizale askoren bisita jasotzen du eta bide nabarmenak daude urratuta bere iparraldeko bizkarrean gora, Midi handiaren alde malkartsuenari begiratu bat emateko leku aparta da. Bere hegietan urratutako bideek erakusten dute badela ohiko bihurtu den ibilbide bat, mendia inguratzen duena, eta Midiren hegoaldeko isurialdeko hainbat ikuspegirekin gozatzeko aukera ematen duena. Ingurabide honek Pombie aterpea eta Peyreget aintzira lotuz inguratzen du mendia. Ez du igoerak aparteko zailtasunik ibilbide hori baliatuz gero, erraza baita Peyreget lepotik tontorrerainoko tartea. Tontorrean ikuspegia irekia da norabide guztietan, baina, esan beharrik ez dago, arreta handiena Midik eramaten du.