San Quirico mendia

Tontorretik gertu jasotako ermitari zor dio izena San Quirico mendiak. Ermita handia da, baina itxita egoten da antza denez eta ez du aterberik eskaintzen. Ekainaren 16an izaten da San Quirico erromeria Nabaskozetik.
Gorabehera gutxiko bizkar luze batek osatzen du gaina eta ermitatik ehun bat metrora dago buzoia. Bi bide dira nagusiki tontorrera heltzen direnak, bata Biotzari aldetik, Illon aldeko lepotik gora datorrena eta Nabaskoze aldeko Benasako parketik datorrena bestea, pista zabal batean gora lehendabizi eta basoan barrena gero, pinudi eta pagadian zehar. Ibilbidea luzatzeko, Illon aldera jo besterik ez duzue, hura ere zerrendan baitago. Benasako arroila ere ingurune ikusgarria da, Nabaskoze aldean.