Ezkirin mendia

Bertizko jaurerria ipar-ekialdetik mugatzen duten mendiak nahiko ezagunak dira: Legate, Larratzu, Aizkolegi... Askoz ere ospe apalagoa dute ordea Bertizko mendebaldeko muga osatzen dutenek, Oteitzoiana eta Meateko Kaskoa salbu.
Aizkolegitik hego-mendebalderantz mendikateak altuera galdu eta basoa jabetzen da hegi eta bizkarrez. Bertizko muga gainez gain eta lepoz lepo dabil, burdin-hesi eta lauza handiekin markatua. Ezkirin, Suspiro eta Meateko lepoak dira mendikate apal honetako igarobideak, eta haietaraino iristen dira bide garrantzitsuenak bai Bertizko parketik bai inguruko herrietatik.
Mendikatean, iparretik hegoalderantz, hainbat gain aurki ditzakegu: Paretazar (803m), Ezkirin-Añolatz(643m), Iñarmeakako Kaskoa edo Sarasola (637m) eta Irubagoeta (566m). Zenbat eta hegoalderago, orduan eta zabalago basoa, Meateko lepoan zuhaitzak desagertu eta paisaia zabaltzen ikusiko dugu.