Girizu mendia

Orreaga gainean gailentzen den mendia.
Garai batean teleski batek itsusten omen zuen, eta tradizioa ez galtzearren edo, gaur egun antena bat dago gainaldean (ez gailurrean bertan, zorionez) Bere hegi pikuak pagadi garbiz estalita baditu ere, gailurra ikuspegi zabalekoa da. Ikustekoak dira gainaldeko pago okerrak, inguru honetan jotzen duen haize zakarraren lekuko.
Gailurrerainoko bide zehatzik ez badago ere, ohiko ibilbideak Ibañetatik abiatzen dira, bai errepetidoreko pistatik, bai malda gogorrei zuzenean ekinez. Iparraldeko isurialdetik igarotzen den pista zabala ere balia dezakegu Gabarbide leporaino joan eta bertatik gailurrera zuzenean igotzeko.
M. Belaskoren hiztegian irakur dezakegu mendi honen izana "giri" (txilar zuria, Erica Arborea) euskal hitzetik datorrela.